上海
哈尔滨
展开全文
上海
哈尔滨
邮编：201199
电话：021-2289529622895298
上海冷天个特点是湿冷，北方冷天个特点是干冷。今朝，阿拉来听听辣哈尔滨生活过个上海人哪能讲。
祁嘉耀 语言学博士生
【一】
我生垃上海，长垃上海，到仔18岁个辰光，第一趟离开爷娘，到东北哈尔滨去读大学。上海人印象当中个哈尔滨，可能是中国顶顶冷个地方了。至少从地图浪看起来，呒没其他省会城市比哈尔滨更加靠北了；查查气象资料，哈尔滨个冷天，动弗动就零下二三十度，确实也比上海个“零度极寒”结棍得多了。
毕过呢，地理高头个事体，光看数字是弗作数个。我到了哈尔滨以后，再晓得，自家之前搿十几个冷天过勒有多少作孽了。因为勒垃哈尔滨，冬天虽然有得半年，但是也可能是一年当中最幸福个季节了。为之讲，回到上海十多年以后，我还一直垃怀念哈尔滨个冬天。
刚刚讲到，哈尔滨个冬天有得半年，也就是180天左右，比上海多一个半月，上海地区气象学高头个冬天是133天。搿个数据垃生活当中就体现成每年个供暖期长度。东北地区个城市里向，凡是有人活动个室内环境，基本侪有暖气片。哈尔滨从每年10月20号到第二年个4月17号供暖，我呒没事体做个辰光仔细算过一遍，真个是179到180天！
室内环境通上暖气以后，身体高头个感觉就搭上海大两样唻。住垃上海弄堂里个辰光，冷天从外头回到屋里，弗是减少衣裳，而是要增加衣裳，个人形象勒垃寒气个“魔法攻击”面前已经根本弗在乎了，最厚个绒线衫、羊毛裤、棉拖鞋，统统着起来，外头再披一件鸭绒背心，手里向顶好再捧一只汤婆子（又名“汤捂子”，用铜或锡制成的扁形取暖用品）！ 搿眼物事，到了哈尔滨统统弗需要了。
从室外走进哈尔滨个房间，第一桩事体是眼镜豪稍脱下来，因为高头板要蒙上一层水汽个，温差实在大弗过。挨下来就是大衣、外裤、帽子、围巾，侪好脱下来了，身浪向只要着一件薄羊毛衫就够了。假使暖气正好开勒旺（沪语读yang音）个说话，羊毛衫也好弗要着了，衬衫或者棉毛衫就可以了。开勒暖气个房间里赛过小阳春一样，根本弗用像上海冷天搿能介，佝头缩颈个过日脚。
【二】
当然，哈尔滨室外零下二三十度个气温确实也弗是打棚个。平常日脚还好，要是刮点风、落点雪个闲话，室外活动就真个弗大适意了。滴水成冰个日脚，对上海来讲可能只是一小段，对哈尔滨来讲就是持久战了。但是我还是发觉，气温计高头个数字，对搿两个地方来讲意义是弗大一样个。
上海个冷天，最低气温降到10度以下个辰光，棉毛裤就一定要着起来了；假使跌穿0度个闲话，羊毛裤、绒线裤也是弗着弗来三个。但是我到哈尔滨个第一个冷天，到了零度再意识到，我个棉毛裤好像还摆垃行李箱里向嘛；等到零下十几度个辰光再想起来，是弗是应该担羊毛裤寻出来着了。后首来我再晓得，江南个空气湿度要比东北高得多，而从物理学高头来讲，干燥空气个“比热容”比湿润空气个高，可以理解为：人体垃干冷环境当中散发热量比垃湿冷环境当中慢，也就是讲，同样个气温，湿度大个地方感觉更加冷。
我垃东北过过最冷个一个冷天是2006年个春节。之前每年春节侪是回到上海来过个，搿一年，我决定要体验一下传说当中北国冰城个三九寒冬。一介头留下来以后，我再发觉，虽然室内有得暖气，但是一旦离开暖气房间，我还是弗大能够接受零下三十几度个考验。哈尔滨热天最高也有零上三十五度左右，一年当中室外温度个温差可以达到七十度，我猜想，建筑设计当中也需要考虑比较大个热胀冷缩空间伐。
【三】
上海人常桩讲：“霉头触到哈尔滨”，意思是倒霉极了。但是我经常又听到哈尔滨朋友讲，到上海过冬再是正宗触霉头唻！ 到底辣啥地方过冬更加适意点呢？ 离开哈尔滨以后，我第一趟回到上海过冬个感觉是交关奇怪个。室外环境明显要比东北适意弗少，至少可以看到绿颜色个草木（哈尔滨冷天连大部分“冬青树”个叶子也要落脱个）。但是走到室内，“魔法攻击”就行弗住了。只好拼命个加衣裳，烧水泡热水袋，后首来搬到了有空调个房子，冷天也开开空调取暖，但是还是比弗上北方个暖气有效果。
迭枪上海刚刚过好仔元旦，好天气还呒没过着几天，一爿天又阴下来了，小雨落落，瀴笃笃冷丝丝，湿冷个感觉来得个结棍。搿面眼孵惯暖气个北方朋友，侪辣辣抱怨上海湿嗒嗒个冷天，穷喊弗适意，强烈呼吁长江流域也搞集中供暖。
东北个冬天留拨我最美好个记忆，就是垃暖气房间里向吃冷饮、吃冰冻个水果。夜里向，从地摊高头买得来“冻梨”“冻柿子”，还有各种棒冰、雪糕（直接摆垃地浪向卖个），进到室内。一边看窗门外头个鹅毛大雪，一边听柴可夫斯基，一边用调羹舀“冻柿子”里向像刨冰一样个果肉，搿种奇妙个感觉，回到上海以后，就再也呒没机会去体验了。
